Դիջիպատում 2013

 Առհասարակ, իմ կյանքի լավագույն ձեռքբերումներից մեկը համարում եմ «Մխիթար Սեբաստացի» կրթահամալիրում աշխատելը: Միջավայր, որտեղ հնարավորություն ունես ոչ միայն «աշխատելու», այլև ինքնակրթվելու, բացահայտելու, երևակայելու, ստեղծագործելու և զարգանալու:

 2013-ն ինձ համար շատ բեկումնալից էր: Տարին սկսվեց Դիջիթեք 2013-ով, որտեղ ես և իմ 5 տարեկանների խումբը «Ուսումնական բլոգ, կայք, էջ» անվանակարգում ներկայացրեցինք մեր դասարանական բլոգը և արժանացանք մրցանակի:

Կարևորում եմ նաև, որպես դիպլոմային նախագծի ղեկավար, մեր քոլեջի «Նախադպրոցականի կրթություն» բաժնի մի խումբ ուսանողների հետ աշխատելը, որի արդյունքում միասին ստեղծեցինք «Բզեզիկներ» ուսումնական բլոգը:

Կարևոր ձեռքբերում էր նաև երաժշտական կրթություն ստանալս: 2013-ին ավարտեցի քոլեջը՝ ստանալով երաժշտության ուսուցչի, երաժշտական ղեկավարի որակավորում: Սիրում եմ երաժշտությունը, հատկապես եթե այն մատուցվում է ճիշտ և մաքուր: Իսկ «Սեբաստացիներ» երգչախմբում երգելն, անխոս, ձեռբերում է այդ առումով:

Ամա՜ռ: Էլ ինչ ամառային ուսումնական ճամբար առանց ինձ: 2 շաբաթ աշխատեցի Նոր դպրոցի ամառային ճամբարում՝ որպես ճամբարի պետ: Միշտ աշխատել եմ նույն տարիքի երեխաների հետ, իսկ ճամբարում աշխատելը մեծ փորձի ձեռքբերում էր, քանի որ 2 հրաշալի շաբաթ անցկացրեցի 5-12 տարեկանների տարատարիք խմբի հետ:

Տարին առանձնացավ նրանով, որ 5 տարի աշխատելով 5 տարեկանների մեկամյա նախապատրաստական խմբում՝ 2013-ին իմ խմբի հետ տեղափոխվեցի 2-րդ դասարան: Իսկ նախագծային ուսուցումն իր հերթին էլ ավելի նպաստեց ինքնավստահ լինելու և առաջ գնալու: Կարևոր էր նաև կրտսեր և ավագ դպրոցի սովորողների համատեղ աշխատանքը՝ Աշնանային ծառատունկ 2013, երբ ավագ ընկերներն օգնում էին փոքրերին ուսումնասիրել, բացահայտել և, իսկապես, իմացումի հրճվանք ապրել:

Իսկ տարեվերջյան իմ ձեռբերման մասին բոլորդ եք տեղյակ, կարծում եմ՝ կարիք չկա գրելու: Չնայած՝ «ձեռքբերում» բառն այս դեպքում տեղին չէ:  Ուղղակի ուզում եմ ասել, որ երջանիկ եմ:

Վստահ եմ, որ 2014-ը հաջողակ և բեղուն տարի է լինելու բոլորիս համար՝ բոլոր առումներով: Դեռ շատ անելիքներ կան, նորանոր նախագծեր ու դրանցից բխող արդյունքներ:

Single Post Navigation

← Older Entry

Newer Entry →